جلاش بالكنافة والمكسرات

المقادير:
لفة جلاش
ربع كيلو كنافة
ربع كوب سمنة
مكسرات حسب الرغبة
الشربات:
2 كوب سكر
كوب مياة
نصف ليمونة
ملعقة كبيرة عسل جلوكوز او عسل نحل (اختياري)
طريقة التحضير:
أول حاجة حضّري الشربات: على نار متوسطة، اخلطي السكر مع المياه وقلبيهم لحد ما يدوب السكر. لما يبدأ الخليط يغلي، ضيفي عصير نص ليمونة والعسل (لو هتستخدميه)، وسيبيه يغلي على نار هادية حوالي 7 دقايق لحد ما يبقى تقيل شوية. طفي عليه وسيبيه يبرد.

دلوقتي نبدأ في الجلاش بالكنافة: سخني السمنة وسيحيها. افردي لفة الجلاش وقطعيها حسب حجم الصينية اللي هتستخدميها. ادهني كل ورقة جلاش بالسمنة وسيبيهم على جنب.

في طاسة، حطي الكنافة مع شوية سمنة صغيرة وقلبيها لحد ما لونها يبقى دهبي. لو هتحطي مكسرات، اخلطيها مع الكنافة.

رصي نص كمية الجلاش المدهون في صينية مدهونة بالسمنة، وافردي فوقه الكنافة. بعد كده رصي باقي ورق الجلاش بنفس الطريقة. قطعي الجلاش لمربعات أو أي شكل تفضليه، وادهني وشه بالسمنة.

دخلي الصينية فرن سخن على درجة حرارة 180 مئوية، وسيبيها حوالي 20-25 دقيقة لحد ما الجلاش ياخد لون دهبي حلو. أول ما تخرجي الصينية من الفرن، صبي عليها الشربات البارد بالتساوي وهي سخنة. سيبيها تشرب الشربات شوية قبل التقديم.