🌸وصفة لابيري بصوص بيضة تشهي😍 نقي البطاطا نتاعك واغسليها وقطعيها وخليها طيب مع ورقة رند وحبة ثوم بلا ماترابيها ديريها كيم راها وديري لاملح وبلعي عليها لاكيكوط وخليها طيب قيس ماطيبلك نحيها وهي سخونة ارحيها برحاية ولا باتور ولافرشيطة وديريلها قيس فنجال لاماء لي طابت فيه مع نص كاس حليب ولحليب على حساب لقوام لي تحوسو عليه نتع لابيري وفرماج ومغرف زبدة وخلطي كل شي ومن جيهة تكوني وجدتي لاصوص لابيضة لاصوص 😋 ديري ربع صدر دجاج ولا نص لي عندك وقطعيه شرائح وحطيه في لمقلة يتقلا وملحيه وديري شوية فلفل اسود قيس ماياخذ اللون الذهبي نحيه وفي نفس لمقلة وزيت لي بقى ديري حبة بصل صغيرة مرابيا مع توم وزيتون مقطع رونديلات ليزيبيس زنجابيل كركم فلفل اسود شوية كمون وخليها تتقلى ومبعد رجعيلها دجاج يتقلا معاها وديري مغرف فارينة وخليها تتقلا وزيدي كاس حليب وخلطي غاية وخليها طيب على نار قليلة قيس متولي راح تنحيها زيديلها زوج حبات فرماج مثلاثات وغي تعقد نحيها وقدميها مع لابيري 🌸ملاحظة: اذا نشفلك لاصوص زيدي لحليب واذا تحوسي كمية كبيرة ضعفي لمكونات برك وغادي تجيكم ولا اروع