🌺 البقلاوة العجينة 4 كيلات فرينة (سيم) كيلة سمن ذايبة وباردة ( سمن المدينة) رشة ملح مغرفة صغيرة حليب بودرة(إختياري) باه طيب حمرة مليحة برك بيضة كاملة ماء وماء زهر دافيين الحشو: ثلث كيلات مكسرات ولا كاوكاو( محمصين خفيف برك) كيلة ناقصة اصبعين سكر عادي ربع مغارف سمن ذايب لفاني ماء الزهر الطريقة: نغربل الفرينة ونحط فوقها السمن ونبقا نبسس فيها بيديا مليح وحد 10 دقايق من بعد نحط حليب بودرة و ملح و لبيضة ونخلط شوي و نلم بماء وماء الزهر نخليها طرية مش يابسة و مش تتلاسق فليد بصح لازم تكون طرية نعجنها وحد 10 دقايق و نشكلها كرات صغار من الافضل تستعملي الميزان درت 13 قرصة 6 من تحت و 7 من فوق و نغلفها ونحطها ترتاح ليلة كاملة فلريجيدار الحشو : انا نعاود نرحي المكسرات مع السكر من بعد نحط السمن و لفاني نخلطهم مليح و نزيد ماء الزهر قيس ميتفتل الحشو مش يتشمخ و نغطيه و نحطو فثلاجة ليلة كاملة لغدوة قبل بساعتين متبداي تخدمي اجبدي لعجينة ولحشو باه تتنحالهم لبرودة ولعجينة تطلق روحها باه تبداي تخدمي بيهم انا نطرح بزوج قرص بيناتهم النشا و نكثر النشا باه ميلصقوليش و نبدا نحطهم فلبلاطو نكون داهناتو بالسمن من قبل و بين الطبقة و الطبقة ندهن بالسمن مليح مش نقيس برك هاذا هو السر لول لتوراق كي نخصها كامل منقصهاش نغطيها مليح و نخليها على اقل 6 سوايع باه نقطعها و ندهنها بالسمن و ندخلها طيب الفرن نكون مسخناتو من قبل ندخل لبقلاوة طيب على درجة حرارة قليلة و نطلعها لفوق باه طيب في عقلها و تتورق ( هاذا هو السر الثاني للتوراق) كون تزيديلها النار تزرب الطيب من تحت و فنص تبقا عجينة ومتتورقش و كي طيب من تحت نشعللها من لفوق وقت طياب داتلي تقريب ساعة ونص وكل وحدة ولفور تاعها بالصحة والراحة 🥰