اللي بيعملوا عمر مرموش ده تاريخ كبير و عظيم للمصريين في اوروبا !

مرموش من 3 ايام سجل هدف الفوز ل فرانكفورت و جابلهم 3 نقاط و النهاردة بيسجل هدف و يصنع هدفين عشان يجيب 3 نقاط تانية ل فرانكفورت ، جمايله كترت عليهم حرفيا !

المبهر بقي ان عمر مرموش النهاردة دخل التاريخ لانه اول لاعب في تاريخ فرانكفورت يسجل 15 هدف في النصف الاول من الموسم !

عارف يعني ايه لاعب مصري مسيطر علي دوري كبير زي الدوري الالماني ، مسجل كل حاجة بإسمه في الدوري ده ، تعالي نتصدم مع بعض !

= اكتر لاعب مساهم باهداف في الدوري ب 24 هدف في 17 مباراة فقط !
= هداف الدوري ب 15 هدف !
= اكتر لاعب صنع اهداف في الدوري ب 9 اهداف !
= مساهم باهداف في 11 مباراة من اصل 17 !
= اكتر لاعب في الدوري بيسدد علي المرمي
= اكتر لاعب صنع فرص محققة في الدوري ب 11 فرصة
= سجل في كبار القوم ، بايرن ميونيخ و باير ليفركوزن

الجميل في مرموش ان ذهنه مركز في الملعب و مع فريقه برغم اقترابه من السيتي و اتفاقه معاهم ، مقالش ما انا كدة كدة ماشي ، لا بيلعب بنفس طاقته و شغفه و سلوكه !

مرموش عامل موسم فوق الوصف حقيقي ، مرموش ساهم ب 33 هدف في 30 مباراة ، مفيش لاعب ساهم اكتر منه في دوريات اوروبا الكبري غير محمد صلاح فقط !

بدون ادني شك ، مرموش هو افضل لاعب في المانيا و واحد من افضل لاعبين العالم الموسم ده