السكوت سَلام.. من أصعب الإختبارات اللي بتعدّي بيها يوميًا هو إختبار السكوت.. إنك تتجاهل عن عمد الرد على بعض الإساءات.. إنك تختار تفوت موقف وأسلوب في استفزاز أو سخرية وتتعامل كإنك مافهمتش أو ماخدتش بالك وأنت شايف وفاهم وعارف! مع سهولة الردّ القاسي وسلاسة إنك ترد الإساءة بالإساءة.. الصعوبة الحقيقة في إنك تجاهد نفسك علي الصمت والصبر والإحسان.. اختبار بتعرف فيه طاقتك ومدى قدرتك على الصمت والتجاهل والتحكُم في نفسك.. القوة الحقيقية إنك تختار السكوت عن قُدرة مش ضعف ولا قلة حيلة.. إنك تكون قادر ترد، وتجرح، وتضر بس تختار تنتصر لأخلاقك وتربيتك وما تخليش حد يجُرك لمعركة مش بتاعتك.. الندم على السكوت أفضل بكتير من الندم إنك اتكلمت... السكوت مهارة محتاجين نتعلّمها لا تقل أهمية عن مهارات التواصل.. السكوت بيدّيك براح تعرف إمتى وإزاي ومع مين تتكلم وإمتى الصمت هو أبلغ ردّ.. من وصايا #لقمان الحكيم لإبنه "يا بُني إذا افتخر الناس بحُسن كلامهم فافتخر أنت بحُسن صَمتك" السكوت شياكة وساعات بيبقى أبرك من مليون كلمة..