كيك رولي على طريقتي ساهل و كيوجد ف 10دقائق والاهم بنين بزاف 😋 المقادير: 4 بيضات + 1 فانيلا+ 1 ملعقة صغيرة خميرة الحلوة نصف كاس سكر سنيدة +نصف كاس زيت 1 كاس دقيق فورص الطريقة كنضربو البيض والسكر والفانيلا ورشة ملح بالطراب الكهربائي مزيان حتى يتضاعف الحجم ديالو ويولي ابيض نضيفو زيت شوية بشوية وحنا كنطربو ومن بعد نضيفو الدقيق فورص والخميرة ونخلطو بالملعقة الخشبية بشوية ونكبو الخليط فاللاطة مفرشة بورق الزبدة وندخلوها الفران يكون سخون من قبل طيب ماتفوتش 10دقايق ونخرجوها من الفران نقلبوها على شي فوطة نقية الحشوة كتبقى اختيارية انا خديت واحد ياغورت بنكهة الفانيلا ضفت عليه 3ملاعق كبيرة كونفيتير الفريز أو مربى الفراولة خلطت مزيان وحشيت بيه الكيك و روليتو وهو دافي نرجعوه للورق الطبخ ونغطيوه بالسلوفان ونوضعوه فالتلاجة يبرد مزيان من نبعد دهنو من الفوق بالكونفيتير والكوك او اللوز ايفيلي محمر ونقطعوه طرونشات أما الى بغيتوه بالشكل الثاني الاسود كنديرو نفس المقادير وكنزيدو فقط شوية الكاكاو المر بودرة حتى كيأخد اللون وكنزينوه حسب الاختيار وحسب الرغبة وبالصحة والراحة