أنواع الكريمات: ــ كرام باتيسيار ــ كرام ديبلومات ــ كرام موسلين نبداو بكرام باتيسيار ،هاذي الكريمة هي لي نحشو بيها لامونة و الكعك ولا الميلفاي ..الخ وكرام ديبلومات هي خليط ما بين كرام باتيسيار و كرام شونتي ،نستعملوه بزاف فلي تاختيلات و حتى الميلفاي ولا لي تاخت و كرام موسلين هي خليط ما بين كرام باتيسيار و الزبدة ولا مارغارين و نستعملوها في حشو لي كايك 1-وصفة كرام باتيسيار نصف لتر حليب 120غ سكر 60غ مايزينة ملعقة فانيلا 2صفار بيض أو صفار وحدة 50غ زبدة طريقة التحضير: نسخنو الحليب معا السكر على جهة ،و نخلطوا كل المكونات معا بعض ،معا نفرغو الحليب الساخن عليهم ،و نخلطوا و نرجعوه على النار حتى يتقال الخليط ، مبعد نضيفولو الزبدة نفرغوه في وعاء زجاجي ولا لي عندكم ،و نغطوه بورق الشفاف ،بشرط يكون الغلاف ملاااامس الكريمة ،لازم ميبقاش قاع الهوا بيناتهم ،باه مديرناش طبقة يابسة مالفوق ،و ندخلوه الثلاجة كي يبرد نطلعوه بالباتور . 2-كرام ديبلومات : نكون طلعنا كرام شونتي 100غ مليييح ،حوالي كاس ،و نضيفوها الكرام باتيسيار لي نكون خادمينها مقبل و مطلعينها ،نخلطوهم معا بعض و نطلعوهم كامل بالباتور حتى ينسجمو 3- كرام موسلين : نحيبو كرام باتيسيار تعنا نطلعوها بالباتور مليح و نبداو نزيدو فالزبدة حوالي 200غ ،غير بالشوي غير بالشوي حتى تطلع الكريمة تعنا ،و تقدرو تزيدولها شوكولا عادي.#وصفات مكتوبة مع دودو.