سلام البنات جبت ليكوم طريقتي فتحضير سلو هاد المقادير اللي غنقوليكوم خرجولي 3كيلو ديال سلو كيجي معلك وبنين والوصفة كالتالي كناخدو بانيو كبير ولا قصرية كبيرة كنخويو فيها 1كيلو دقيق فورص ابيض رطب محمر من قبل فالفران ومغربل كنضيفو ليه ملعقة كبيرة قرفة مطحونة وملعقة كبيرة حبة حلاوة مطحونة وملعقة كبيرة نافع مطحون ونضيفو 300غ لوز محمر بقشورو فالفران ومهرمش نضيفوه وخودو 200غ لوز ااخر كتسلقوه فالما 5دقايق وصفيوه فشبكة وقشروه ونشفوه بمنديل مزيان عاد قليوه فزيت نباتية باردة تكون كثيرة شوية قليوه فنار متوسطة غير اصفار شوية كتحيدوه فوق ورق نشاف اينشف وتخليوه حتال المرحلة اللي غنقوليكوم ضيفوه فيها ونرجعو للمكونات اللولة كنضيفو للمكونات اللي فالقصرية نص كوزة محكوكة فالحكاكة الرقيقة اختيارية اللي مبغاش الكوزة مايضيفهاش المهم وهزو نص كيلو زنجلان غسلوه من قبل ونشفوه مزيان وحمروه فالفران على نار مهيلة وهزو منو 350غ هرمشوه رقيق شوية وضيفوه مع المكونات اللولة فالقصرية وحتافظو بما تبقا من الزنجلان المحمر صاين خليوه حتال المرحلة الاخيرة اللي غنقوليكوم تضيفوه فيها المهم تضيفو للمكونات اللولة نصف ملعقة صغيرة ملح ونصف كيلو كاوكاو محمر مقشر مهرمش رقيق وتضيفو ايضا 7الحبات ديال المسكة الحرة مطحونين من قبل مع ملعقة كبيرة سنيدة ضيفوهوم وضيفو الكمية اللي حبيتو ديال سكر كلاصي على حسب لحلاوة اللي بغيتو متديروش العسل حنت مكيحافظش على سلو ديالكوم الى درتو سكر كلاصي غيطول عندكوم سلو غيبقا مزيان فترة طويلة المهم كتخلطو هاد النواشف مزيان بيدكوم وهزو رابعة زبدة بلدية ذوبوها حتا يولي لونها نوازيت مايل للاحمر وتعجنو بيها المكونات والزبدة سخونة وعجنو ايضا بالزيت النباتية اللي قليتو فيها اللوز ديالكوم ضيفو ليها شوية زيت وسخنوهوم وعجنو بيهوم المكونات وفي حالة مابغيتوش تخلطو سلو ديالكوم بالزيت النباتية خلطوه بزيت الزيتون ولاكن متسخنوهاش نهاءيا المهم بقاو تضيفو الزيت شوية شوية ونتوما كتدلكو سلو ديالكوم مزيان بيديكوم بجوج بحاليلا كتدلكو العجينة باش ايطلقو المكونات الزيوت اللي فيهوم عركوهوم مزيان ابقاو تذوقو سلو ديالكوم حتا توصلو للحلاوة اللي بغيتو وضيفو سكر كلاصي الى جاكوم سلو مسوس ودلكو مزيان البنات وللاشارة في حالة معندكومش الزبدة البلدية كتعوضوها بزبدة الأكل الزبدة ديال لبوطة ذوبو2 بواطات صغار ديال زبدة الاكل وعجنو بيهوم سلو ديالكوم ايوا وبقاو تضيفو الزيت شوية شوية وتقلبو القوام ديال سلو بيدكوم حتا تحصلو على سلو معلك عاد حبسو الدليك وضيفو لسلو الجنجلان المحمر اللي حتافظتو بيه واللوز مقلي تا هوا خلطوهوم مزيان مع سلو وحتافظو بسلو فشي سوبيرة مغلقة فالكوزينة وللاشارة في حالة جاكوم سلو جاري فوتتو فيه الزيت ضيفولو شوية دقيق محمر مغربل اواحد الحاجة اخرى الى بغيتو تحصلو على لون سلو قهوي بحالي منين تكونو تحمرو الدقيق بقاو تهزو منو ربع ملعقة صغيرة خلطوها فطبسيل مع قطرات زيت وشوفو درجة اللون اللي فالدقيق بقاو هكاك مرة مرة حتا تحصلو على درجة اللون اللي بغيتو فالدقيق قدما كان الدقيق محمر مزيان قدما ايجيكوم سلو محمر وبالصحة والراحة ❤️