خبز السميدة والسر باش يجيكم رطب بحال المخبزة 🧡 الزلافة المستعملة ديال الحريرة لي السعة ديالها 280 حتى 300مل الكأس المستعمل ديال العنبة لي السعة ديالو 150 مل المقادير 500 غ سميدة رقيقة ممتازة او 2 زلايف 300 غ دقيق أبيض او 3 كؤوس عنبة 560 مل ماء او 2 زلايف ملعقة ك زبدة ملعقة ك سكر ملعقة ص ملح ملعقة ك خميرة خبز اول حاجة في اناء كنديرو السميدة ونفرغو عليها الماء سخون ماشي دافئ وهادا هو سر الرطوبية ديال الخبز لأن الماء الساخن كيرطب السميدة وبالتالي مكيجيش قاسح. كنخليوها واحد الخمسة دقايق حتى تشرب ونضيفو ليها المكونات لي بقاو وندلكوها واحد دقيقة وعاد نزيدو الزبدة ونكملو الدليك اما بالعجانة ولا يدينا المهم الخبز ديال السميدة ضروري كيبغي الدليك مزيان حتى ترجع العجينة ملسا نغطيوها ونخليوها تخمر ومن بعد نقسموها كويرات حسب الحجم لي بغينا ونخليوهم يرتاحو شوية نبداو نطلقو كل كرة بشوييية السميدة متكتروش باش يجيكم محمر في الطياب منرققوهمش بزاف وفي نفس الوقت ميكونوش غلاض ونستفو الخبيزات في لاطة مفرشة بالورق ولا مدهونة بالزيت ونخليوهم يخمرو مزيان ونشرطوهم بشفرة ماضية صافي ندخلوهم يطيبو وبالصحة والراحة